2025 ஆம் ஆண்டில் இலங்கை 4,669 மில்லியன் அமெரிக்க டொலர் வெளிநாட்டு முதலீடுகளை ஈர்த்துள்ளது.

2025 முதல் காலாண்டில் அந்நிய நேரடி முதலீடு 90% அதிகரிப்பு:

இலங்கை முதலீட்டுச் சபை 2024 ஆம் ஆண்டின் இதே காலப்பகுதியுடன் ஒப்பிடுகையில் 2025 ஆம் ஆண்டின் முதல் காலாண்டில் வெளிநாட்டு நேரடி முதலீட்டை 96 மில்லியன் ஐ.அ.டொலர்களால் வெற்றிகரமாக அதிகரித்துள்ளது. ஜனாதிபதி அநுரகுமார திசாநாயக்க தலைமையில் நேற்று (20) பிற்பகல் ஜனாதிபதி அலுவலகத்தில் இடம்பெற்ற இலங்கை முதலீட்டு சபையின் முன்னேற்ற மீளாய்வு கூட்டத்தின் போதே ஜனாதிபதி இதனைத் தெரிவித்தார்.

2024 ஆம் ஆண்டின் முதல் காலாண்டுடன் ஒப்பிடுகையில், உள்நாட்டு முதலீடு 21 மில்லியன் அமெரிக்க டொலர்களால் அதிகரித்துள்ளதுடன், 2025 ஆம் ஆண்டின் முதல் காலாண்டில் ஏற்றுமதி வருமானம் 176 மில்லியன் அமெரிக்க டொலர்களால் அதிகரித்துள்ளது என்றும் முதலீட்டு சபையின் அதிகாரிகள் குறிப்பிட்டுள்ளனர்.

2025 ஆம் ஆண்டில் இதுவரை 4,669 மில்லியன் அமெரிக்க டொலர் வெளிநாட்டு முதலீட்டு முன்மொழிவுகளை இலங்கை ஈர்த்துள்ளது. நாட்டிற்கு முதலீடுகளை ஈர்ப்பதுடன் தொடர்புடைய பிரச்சினைகள் மற்றும் சவால்கள் குறித்தும் கூட்டத்தில் கவனம் செலுத்தப்பட்டதுடன், அவற்றை நிவர்த்தி செய்வதற்கான சாத்தியமான உத்திகள் குறித்தும் கலந்துரையாடப்பட்டது.

தேசிய பொருளாதாரத்தை மேம்படுத்துவதிலும் கிராமிய மக்களின் வாழ்க்கைத் தரத்தை மேம்படுத்துவதிலும் முதலீட்டு சபை முக்கிய பங்கைக் கொண்டுள்ளது என்று ஜனாதிபதி அநுரகுமார திஸாநாயக்க தெரிவித்தார்.

பாரம்பரிய துறைகளில் முதலீடுகளை ஈர்ப்பதற்கான வாய்ப்புகள் மிகவும் மட்டுப்படுத்தப்பட்டு வருகின்றன என்றும், எனவே முதலீட்டுக்கான புதிய துறைகளை நாடு அடையாளம் காண வேண்டும் என்றும் அவர் வலியுறுத்தினார்.
Â