உயிர்த்த ஞாயிறு பயங்கரவாதத் தாக்குதல்களால் பாதிக்கப்பட்டவர்களுக்கு தாமதமின்றி நீதியை வழங்கப்படுமென்று ஜனாதிபதி அநுரகுமார திசாநாயக்க உறுதியளித்துள்ளார்.

கொழும்பு ஆயர் இல்லத்தில் நேற்று நடைபெற்ற கர்தினால் மல்கம் ரஞ்சித் ஆண்டகையின் 50வது குருத்துவப் பணி நிறைவு நிகழ்வில் கலந்துகொண்டபோது ஜனாதிபதி இந்த உறுதிமொழியை வழங்கினார்.

நாட்டில் நல்லிணக்கத்தைக் கட்டியெழுப்புவதில் கர்தினால் மல்கம் ரஞ்சித்தின் பல தசாப்த கால அர்ப்பணிப்பைப் ஜனாதிபதி பாராட்டினார். உயிர்த்த ஞாயிறு தாக்குதலில் பாதிக்கப்பட்டவர்களுக்கு நீதி கிடைப்பதற்காக, தனக்கு ஏற்பட்ட அச்சுறுத்தல்களையும் பொருட்படுத்தாமல் அவர் தொடர்ந்து பாடுபடுவதையும் ஜனாதிபதி சுட்டிக்காட்டினார்.

"அரசாங்கத்தினால், அரசாங்கத்திற்கு எதிராக விசாரணை செய்ய வேண்டிய நேரம் ஏற்பட்டுள்ளது," என்று ஜனாதிபதி அநுரகுமார திசாநாயக்க குறிப்பிட்டார். உரிய பொறிமுறையின் மூலம் விசாரணைகள் மேற்கொள்ளப்பட்டு விரைவில் நீதி நிலைநாட்டப்படும் என்றும் அவர் தெரிவித்தார்.

குறித்த மல்வத்து பீட மகாநாயக்க தேரர்கள் உட்பட பல சர்வமதத் தலைவர்கள் இந்த நிகழ்வில் பங்கேற்றிருந்தமை குறிப்பிடத்தக்கது.