மொஹமட் ரிபாய் மொஹமட் சுஹைல் என்ற 21 வயது விமானக் கற்கைநெறி மாணவர், இஸ்ரேலியக் கொடியை மிதிக்கும் காணொளியை இன்ஸ்டாகிராமில் பதிவிட்டதாகக் கூறப்படும் குற்றச்சாட்டில் இலங்கையின் கடுமையான பயங்கரவாதத் தடைச் சட்டத்தின் (PTA) கீழ் சுமார் ஒன்பது மாதங்களாகத் தடுத்துவைக்கப்பட்டுள்ளார்.

மாவனெல்லையைச் சேர்ந்த சுஹைல் முதலில் அக்டோபர் 2024-ல் தெகிவளைப் பொலிஸாரால் இஸ்ரேலியத் தூதரக வளாகத்திற்கு அருகில், தேசிய அடையாள அட்டை இல்லாத காரணத்தால் கைது செய்யப்பட்டார் பின்னர் அடையாள அட்டை சமர்ப்பிக்கப்பட்டதைத் தொடர்ந்து நீதிமன்றத்தால் விடுவிக்கப்பட்டார்.

ஆனால் நீதிமன்றம் அவரைப் பிணையில்லாமல் விடுதலை செய்தபோதிலும் இன்ஸ்டாகிராம் காணொளி தொடர்பாக அவர் மீண்டும் கைது செய்யப்பட்டு பயங்கரவாதத் தடைச் சட்டத்தின் கீழ் விளக்கமறியலில் வைக்கப்பட்டுள்ளார்.

அவரது வழக்கறிஞர் கருத்துப்படி இதுவரை எந்தவொரு உத்தியோகபூர்வக் குற்றச்சாட்டுகளும் பதிவு செய்யப்படவில்லை என்றும் பொலிஸார் எந்தவொரு குற்றத்திற்கான ஆதாரத்தையும் சமர்ப்பிக்கவில்லை என்றும் தெரிவித்துள்ளார்.

இந்த விவகாரம் இலங்கை மனித உரிமைகள் ஆணைக்குழுவுக்கு அறிவிக்கப்பட்டு சுஹைலின் குடும்பத்தினர் முறைப்பாடு ஒன்றையும் பதிவு செய்துள்ளனர் எந்தவொரு குற்றச்சாட்டும் இன்றி இவ்வளவு நீண்ட காலம் தடுத்துவைக்கப்பட்டிருப்பது குறித்து மனித உரிமை அமைப்புகளும் சட்ட வல்லுநர்களும் கவலை தெரிவித்துள்ளனர்.

பொலிஸ் தகவல்களின்படி, இந்த வழக்கு இன்று (ஜூலை 9, புதன்கிழமை) விசாரணைக்கு வர உள்ளது.