இலங்கையில் மாற்றுத்திறனாளிகளின் போக்குவரத்து உரிமையை உறுதிப்படுத்த ‘கிளீன் ஸ்ரீலங்கா’ திட்டத்தின் கீழ் தாழ்தள வசதி கொண்ட பிரத்தியேக பஸ்கள் அடுத்த மாதம் முதல் சேவையில் ஆரம்பிக்க உள்ளன.

முதற்கட்டமாக ஹம்பாந்தோட்டை துறைமுகத்தில் 10 நவீன குளிரூட்டப்பட்ட பஸ்கள் கொண்டு வரப்பட்டு, எதிர்வரும் சனிக்கிழமை கொழும்பு மெட்ரோ பஸ் நிறுவனத்திற்கு ஒப்படைக்கப்பட உள்ளன. 33 ஆசனங்களைக் கொண்ட இப்பஸ்களில் ஒரே நேரத்தில் 80 பயணிகள் பயணம் செய்ய முடியும். சக்கர நாற்காலிகள் பயணிக்கும் போது பாதுகாப்பை உறுதிப்படுத்தும் தொழில்நுட்ப அம்சங்கள் இடம்பெற்றுள்ளன.

புதிய சேவை மாகும்புர பன்முக போக்குவரத்து மையத்தை மையமாக கொண்டு, காலை மற்றும் மாலை நேரங்களில் 40 நிமிடங்களுக்கு ஒருமுறை பஸ்கள் இயக்கப்படும். முக்கிய சுகாதார மையங்களையும் நேரடியாக இணைக்கும் வகையிலும் திட்டமிடப்பட்டுள்ளது.

28 சாரதிகள் மற்றும் நடத்துநர்களுக்கு பஸ் தொழில்நுட்பம், பயணிகள் பாதுகாப்பு மற்றும் மாற்றுத்திறனாளிகளுடன் தொடர்பு கொள்ளும் பயிற்சி வழங்கப்பட்டுள்ளது. முன்னோடித் திட்ட வெற்றியை கருத்தில் கொண்டு, ஓகஸ்டில் மேலும் 100 பஸ்கள் நாட்டில் சேவையில் இணைக்கப்படவுள்ளன.