பயணக் கட்டணத்தை அதிகரிக்க கோரி தனியார் பேருந்து ஊழியர்கள் முன்னெடுத்து வரும் பணிப்பகிஷ்கரிப்பால், அம்பாறை மத்திய பேருந்து நிலையத்தில் இன்று பதற்றமான சூழல் நிலவியது.

அம்பாறை மாவட்டத்தின் சில பகுதிகளில் தனியார் பேருந்துகள் சேவையில் இருந்து விலகியதால், குறுகிய மற்றும் நீண்ட தூரப் போக்குவரத்து சேவைகள் பலவும் பாதிக்கப்பட்டுள்ளன. மக்களின் நலனை கருத்தில் கொண்டு, இடையிடையே சில பேருந்துகள் மட்டும் இயக்கப்பட்டு வருகின்றன.

அம்பாறையிலிருந்து கொழும்பு, கண்டி, அனுராதபுரம், கேகாலை உள்ளிட்ட தூரப் பகுதிகளுக்கான சேவைகள் முழுமையாக நிறுத்தப்பட்டுள்ளன. இதனால், பயணிகள் நீண்ட நேரம் பேருந்து நிலையங்களில் காத்திருந்து கடும் அசௌகரியங்களுக்கு உள்ளாகியுள்ளனர்.

இந்த நிலையில், அம்பாறையிலிருந்து மாத்தறை நோக்கி ஒரு தனியார் பேருந்து புறப்பட முயன்றபோது, பணிப்பகிஷ்கரிப்பில் ஈடுபட்டிருந்த மற்ற பேருந்து சாரதிகள் மற்றும் நடத்துநர்கள் அதனை வழிமறித்து எதிர்ப்பு தெரிவித்தனர்.

பணிப்பகிஷ்கரிப்பை பின்பற்றாமல் பேருந்தை இயக்க முயன்றதாக குற்றம் சாட்டி, அந்த பேருந்தின் சாரதியை தாக்க முயற்சி மேற்கொள்ளப்பட்டதால் அங்கு அமைதியற்ற நிலை ஏற்பட்டது.

இதையடுத்து சம்பவ இடத்திற்கு வந்த அம்பாறை தலைமையகப் பொலிஸ் நிலைய பொறுப்பதிகாரி உபுல் இந்திரஜித் குணவர்தன தலைமையிலான பொலிஸார் நிலைமையை கட்டுப்பாட்டுக்குள் கொண்டு வந்தனர்.

தற்போது அப்பகுதியில் பொலிஸ் பாதுகாப்பு அதிகரிக்கப்பட்டுள்ளதுடன், நிலைமை சுமுகமாகியுள்ளது. எனினும், தனியார் பேருந்து பணிப்பகிஷ்கரிப்பு தொடர்ந்துவருகிறது.