பாதாள உலகக் குழுத் தலைவர் எனக் கூறப்படும் மாகந்துரே மதுஷ் கொலை சம்பவம் தொடர்பான விசாரணைகளை அடிப்படையாகக் கொண்டு, கொழும்பு குற்றத்தடுப்புப் பிரிவின் முன்னாள் பணிப்பாளரும் ஓய்வுபெற்ற சிரேஷ்ட பொலிஸ் அத்தியட்சகருமான ஜனக் நந்தன உள்ளிட்ட நான்கு அதிகாரிகளைக் கைது செய்வதைத் தற்காலிகமாகத் தடை செய்து மேன்முறையீட்டு நீதிமன்றம் உத்தரவு பிறப்பித்துள்ளது.

கொழும்பு குற்றத்தடுப்புப் பிரிவில் பணியாற்றிய குறித்த அதிகாரிகள் தாக்கல் செய்த மனுவை பரிசீலித்த பின்னர், மேன்முறையீட்டு நீதிமன்ற நீதியரசர் பிரியந்த பெர்னாண்டோ இந்த இடைக்காலத் தடை உத்தரவை வழங்கினார்.

மனுதாரர்கள், மாகந்துரே மதுஷ் கொலை சம்பவம் தொடர்பாக குற்றப்புலனாய்வுத் திணைக்களம் (CID) விசாரணைகள் முன்னெடுத்து வருவதாகவும், அதனுடன் தொடர்பாக தாங்கள் எந்நேரமும் சட்டவிரோதமாக கைது செய்யப்படக்கூடிய அபாயம் இருப்பதாகவும் தெரிவித்துள்ளனர்.

மேலும், குற்றப்புலனாய்வுத் திணைக்களத்தின் பணிப்பாளர் ஷானி அபேசேகரவின் வழிகாட்டுதலின் கீழ் விசாரணைகள் நடைபெறுவதால் தங்களுக்கு பாதிப்பு ஏற்பட வாய்ப்புள்ளதாகவும் அவர்கள் சுட்டிக்காட்டியுள்ளனர்.

இதனையடுத்து, தங்களை கைது செய்வதைத் தடுக்க இடைக்கால உத்தரவு வழங்குமாறும், விசாரணையை ஷானி அபேசேகரவிடமிருந்து நீக்குமாறும் மனுதாரர்கள் நீதிமன்றத்தில் கோரிக்கை விடுத்திருந்தனர்.

மனுதாரர்கள் சார்பில் ஜனாதிபதி சட்டத்தரணி அலி சப்ரி முன்வைத்த வாதங்களை பரிசீலித்த நீதிமன்றம், கைது தடை உத்தரவையும் பிறப்பித்ததுடன், வழக்கை மீண்டும் மே 15 ஆம் திகதி விசாரணைக்கு அழைக்கவும் உத்தரவிட்டது.