வெலிக்கடை சிறைச்சாலையில் இடம்பெற்ற மோதல் சம்பவத்தில் இரண்டு கைதிகள் உயிரிழந்தமை தொடர்பாக சிறைச்சாலை தலைமை அதிகாரி ஒருவரும் பெண் அதிகாரி ஒருவரும் கைது செய்யப்பட்டுள்ளனர்.

சம்பவம் தொடர்பில் சிறைச்சாலை திணைக்களம் விசேட விசாரணைகளை ஆரம்பித்துள்ளது. உதவி சிறைச்சாலை அத்தியட்சகர் ஒருவரின் தலைமையில் மேலதிக விசாரணைகள் நடைபெற்று வருகின்றன என சிறைச்சாலை ஊடகப் பேச்சாளர் ஏ.சி. கஜநாயக்க தெரிவித்துள்ளார்.

நேற்று (27) காலை 11 மணியளவில், போதைப்பொருள் குற்றச்சாட்டில் விளக்கமறியலில் வைக்கப்பட்டிருந்த இரு சந்தேக நபர்கள் சிறைச்சாலையிலிருந்து தப்பிச் செல்ல முயன்றுள்ளனர். அவர்களை தடுக்க முயன்ற சிறைக்காவலருடன் ஏற்பட்ட மோதலின் போது இருவரும் மயங்கி விழுந்ததாக தெரிவிக்கப்படுகிறது.

இதில் ஒருவர் சம்பவ இடத்திலேயே உயிரிழந்துள்ளார். காயமடைந்த மற்றைய கைதி மற்றும் சிறை அதிகாரி சிகிச்சைக்காக மருத்துவமனையில் அனுமதிக்கப்பட்ட நிலையில், பின்னர் அந்த இரண்டாவது கைதியும் உயிரிழந்துள்ளார்.

எனினும், மரணங்கள் தொடர்பில் சந்தேகம் வெளியிடப்பட்டுள்ளது. கைதிகள் சிறை அதிகாரிகளால் தாக்கப்பட்டிருக்கலாம் என உறவினர்கள் குற்றச்சாட்டு முன்வைத்துள்ளனர்.

இந்நிலையில், பொரளை பொலிஸாரும் சிறைச்சாலை திணைக்களமும் இணைந்து மேலதிக விசாரணைகளை முன்னெடுத்து வருகின்றனர் மரணத்திற்கான உண்மையான காரணம் குறித்து தீவிர புலனாய்வு நடைபெற்று வருகிறது.