கைபர் பக்துன்க்வா மாகாணத்தில் உள்ள பொலிஸ் நிலையம் ஒன்றை குறிவைத்து நேற்று (02) இரவு நடத்தப்பட்ட தற்கொலை கார் குண்டுத் தாக்குதலில், மூன்று பெண்கள் மற்றும் ஒரு குழந்தை உட்பட ஐந்து பேர் உயிரிழந்துள்ளதாக பொலிஸார் தெரிவித்துள்ளனர்.

இந்த தாக்குதல் பன்னு மாவட்டம் டோமெல் பகுதியில் இடம்பெற்றதாக கூறப்படுகிறது. காரை ஓட்டி வந்த தற்கொலைத் தாக்குதலாளர், காவல் நிலையத்தை நேரடியாக மோதியதன் பின்னர் சக்திவாய்ந்த வெடிப்பு ஏற்பட்டதாக தகவல்கள் தெரிவிக்கின்றன.

வெடிப்பின் தாக்கத்தால் அருகிலிருந்த பல வீடுகள் சேதமடைந்துள்ளதுடன், குறைந்தது நான்கு பொலிஸார் காயமடைந்துள்ளனர். வெடிச்சத்தம் தொலைதூரம் வரை கேட்கப்பட்டதாகவும், அதிர்வலைகள் அப்பகுதி மக்களிடையே பெரும் பீதியை ஏற்படுத்தியதாகவும் தெரிவிக்கப்படுகிறது.

மேலும், வெடிப்பு நிகழ்ந்த உடனேயே துப்பாக்கிச் சூடும் இடம்பெற்றதால், அப்பகுதியில் பதற்றம் அதிகரித்தது.

இந்த தாக்குதலில் பொலிஸ் நிலையமே முதன்மை இலக்காக இருந்தது என முதற்கட்ட விசாரணைகளில் தெரியவந்துள்ளதாக அதிகாரிகள் தெரிவித்துள்ளனர்.

சம்பவ இடத்தில் அவசர மீட்பு மற்றும் நிவாரண பணிகள் தொடர்ந்து நடைபெற்று வருகின்றன. மீட்புக் குழுவினர் மூன்று பெண்கள் மற்றும் ஒரு குழந்தை உட்பட ஐந்து பேரின் உடல்களை மீட்டுள்ளதாகவும் பொலிஸார் உறுதிப்படுத்தியுள்ளனர்.