மத்திய கிழக்கில் 40 நாட்களாக நீடித்த மோதல் காரணமாக உலகளாவிய எண்ணெய் மற்றும் எரிவாயு விநியோகச் சங்கிலிகள் கடுமையாக பாதிக்கப்பட்டுள்ள நிலையில், இந்தியா ஒரு சிறப்பு இராஜதந்திர முயற்சியைத் தொடங்கியுள்ளது.

இந்த முயற்சியின் முக்கிய நோக்கம், இடைநிறுத்தப்பட்ட எண்ணெய் மற்றும் இயற்கை எரிவாயு இறக்குமதிகளை மீண்டும் சீராகப் பெறுவதாகும்.

இந்தியா ஏற்கனவே சவூதி அரேபியா, கட்டார் மற்றும் ஐக்கிய அரபு எமிரேட்ஸ் (UAE) போன்ற முக்கிய எரிசக்தி உற்பத்தி நாடுகளுடன் நேரடி இராஜதந்திர தொடர்பை வலுப்படுத்தியுள்ளது.

இந்த முயற்சியின் ஒரு பகுதியாக, வெளியுறவு அமைச்சர் எஸ். ஜெய்சங்கர் அபுதாபியில் ஐக்கிய அரபு எமிரேட்ஸ் அதிபர் ஷேக் முகமது பின் சயீத்துடன் சந்திப்பு நடத்தினார். இதில் இருதரப்பு எரிசக்தி ஒத்துழைப்பு மற்றும் விநியோக நிலைத்தன்மை குறித்து விவாதிக்கப்பட்டது.

இந்தியா–UAE இடையிலான இருதரப்பு வர்த்தகம் 2024–25 ஆம் ஆண்டில் சுமார் 100 பில்லியன் அமெரிக்க டொலரை எட்டியுள்ளதாகவும், அதை 2032 ஆம் ஆண்டுக்குள் 200 பில்லியன் டொலராக உயர்த்த இலக்கு வைக்கப்பட்டுள்ளதாகவும் தெரிவிக்கப்படுகிறது.

அதே நேரத்தில், மத்திய பெட்ரோலியத்துறை அமைச்சர் ஹர்தீப் பூரி கத்தாருக்கு சென்று எரிசக்தி விநியோகம் குறித்து பேச்சுவார்த்தை நடத்தியுள்ளார்.

இந்தியா தனது இயற்கை எரிவாயு (LNG) தேவையின் சுமார் 50% இறக்குமதி செய்கிறது. இதில் பெரும் பகுதி கத்தாரிலிருந்து கிடைக்கிறது.

மத்திய கிழக்கு மோதலின் போது ஹோர்முஸ் நீரிணையில் ஏற்பட்ட தடைகள் மற்றும் சில எரிவாயு உற்பத்தி நிலையங்கள் தற்காலிகமாக மூடப்பட்டதால், இந்தியாவின் LNG விநியோகம் கடுமையாக பாதிக்கப்பட்டது.

இதனால் உலகளாவிய எரிசக்தி சந்தையில் ஏற்பட்ட குழப்பத்தை குறைக்கவும், விநியோக சங்கிலிகளை மீண்டும் இயல்பாக்கவும் இந்தியா தீவிரமான இராஜதந்திர நடவடிக்கைகளை முன்னெடுத்து வருகிறது.