மத்திய கிழக்கின் முக்கிய கடல் பாதையான ஹோர்முஸ் நீரிணை பகுதியில் அமெரிக்கா மற்றும் ஈரான் இடையிலான பதற்றம் மீண்டும் அதிகரித்துள்ளது.

திங்களன்று இந்த நீரிணையை மீண்டும் திறக்க முயன்றபோது, ஈரானிய படைகள் மீது அமெரிக்கப் படைகள் துப்பாக்கிச் சூடு நடத்தியதாக அமெரிக்கா இராணுவம் தெரிவித்துள்ளது. மேலும், பொதுமக்கள் கப்பல்களை குறிவைத்து வந்த ஆறு சிறிய படகுகள் மூழ்கடிக்கப்பட்டதாகவும் கூறப்பட்டுள்ளது.

அமெரிக்கக் கொடியுடன் இயங்கும் இரண்டு வணிகக் கப்பல்கள் பாதுகாப்புடன் நீரிணையை கடந்து சென்றதாகவும் தெரிவிக்கப்பட்டுள்ளது.

இதற்கிடையில், ஐக்கிய அரபு எமிரேட்ஸ் ஏப்ரல் மாதம் தொடக்கத்தில் ஏற்பட்ட பலவீனமான போர் நிறுத்தத்திற்குப் பிறகு முதல் முறையாக ஈரானின் தாக்குதலுக்கு உள்ளாகியுள்ளதாக கூறியுள்ளது. அந்நாட்டின் பாதுகாப்பு அமைச்சகம், 15 ஏவுகணைகள் மற்றும் 4 ட்ரோன்களை தடுத்து நிறுத்தியதாக தெரிவித்துள்ளது.

கிழக்கு எமிரேட்டான புஜைரா பகுதியில் உள்ள முக்கிய எண்ணெய் நிலையத்தில் ட்ரோன் தாக்குதலால் தீ விபத்து ஏற்பட்டதாகவும், இதில் மூன்று இந்தியர்கள் காயமடைந்ததாகவும் தகவல்கள் வெளியாகியுள்ளன. மேலும், இரண்டு சரக்கு கப்பல்கள் தீப்பற்றி எரிந்ததாகவும் கூறப்படுகிறது.

இந்த தாக்குதல்களை ஈரான் நேரடியாக உறுதிப்படுத்தவோ மறுக்கவோ இல்லை. ஆனால், அந்நாட்டு வெளியுறவு அமைச்சர் அப்பாஸ் அராக்சி, அமெரிக்கா மற்றும் ஐக்கிய அரபு எமிரேட்ஸ் மீண்டும் மோதலில் இழுக்கப்படுவதில் எச்சரிக்கையாக இருக்க வேண்டும் என தெரிவித்துள்ளார்.

இதற்கிடையில், ஹோர்முஸ் நீரிணையை மீண்டும் திறக்கும் முயற்சிகள், உலகளாவிய எரிசக்தி விநியோகத்தை சீராக்க உதவினாலும், பெரிய அளவிலான மோதலை மீண்டும் தூண்டும் அபாயம் இருப்பதாக ஆய்வாளர்கள் எச்சரிக்கின்றனர்.

ஈரான் இந்த நீர்வழிப் பாதையில் கப்பல்களை குறிவைத்து தாக்குதல் நடத்தி வருவதாகவும், தொடர்ந்து அதனை மேற்கொள்ளத் தயார் என கூறியுள்ளதாக தகவல்கள் தெரிவிக்கின்றன. இதனால் கப்பல் நிறுவனங்கள் மற்றும் காப்பீட்டு நிறுவனங்கள் அதிக ஆபத்து காரணமாக இந்த பாதையை தவிர்க்கும் நிலை ஏற்பட்டுள்ளது.

இந்நிலையில், உலக எரிபொருள் விநியோகம் மற்றும் பொருளாதாரம் மீது இந்த மோதல் தீவிரமான தாக்கத்தை ஏற்படுத்தக்கூடும் என கவலை வெளியிடப்பட்டுள்ளது.