பாகிஸ்தானின் உயர்மட்ட இராணுவ கட்டளை கட்டமைப்பில் முக்கிய மாற்றங்களை ஏற்படுத்தும் வகையில், நாட்டின் மிக உயர்ந்த இராணுவப் பதவியின் அதிகாரங்களை முதன்முறையாக சட்டரீதியாக வரையறுக்கும் இரண்டு சட்டங்களை அந்நாட்டு நாடாளுமன்றம் நிறைவேற்றியுள்ளது.

கடந்த ஆகஸ்ட் 20ஆம் திகதி தேசிய சட்டப்பேரவை, Defence Forces of Pakistan Act, 2026 மற்றும் National Command Authority Act, 2010 சட்டத்துக்கான திருத்தத்தை அங்கீகரித்தது. கடந்த ஆண்டு நவம்பரில் கொண்டுவரப்பட்ட 27ஆவது அரசியலமைப்புத் திருத்தத்தின் மூலம் உருவாக்கப்பட்ட Chief of Defence Forces (CDF) பதவிக்கு இந்தச் சட்டங்கள் சட்டரீதியான அதிகாரங்களை வழங்குகின்றன.

இந்த மசோதாக்கள் தேசிய சட்டப்பேரவையின் ஆரம்ப நிகழ்ச்சி நிரலில் இடம்பெறவில்லை. அமைச்சரவை அவற்றுக்கு அன்றைய தினமே ஒப்புதல் அளித்த நிலையில், சில மணி நேரங்களுக்குள் அவை நாடாளுமன்றத்தில் நிறைவேற்றப்பட்டன. கடந்த ஆண்டு 27ஆவது அரசியலமைப்புத் திருத்தமும் இதேபோன்ற குறுகிய காலத்துக்குள் நாடாளுமன்றத்தில் நிறைவேற்றப்பட்டிருந்தது.

இந்த மாற்றங்கள், 2025 மே மாதம் இந்தியா மற்றும் பாகிஸ்தானுக்கு இடையே இடம்பெற்ற நான்கு நாள் இராணுவ மோதலுக்கு ஒரு வருடத்துக்கும் மேலான காலத்துக்குப் பின்னர் கொண்டுவரப்பட்டுள்ளன.

ஆய்வாளர்களின் கருத்துப்படி, இந்தச் சட்ட மாற்றங்கள் 1976ஆம் ஆண்டுக்குப் பின்னர் பாகிஸ்தானின் உயர்மட்ட இராணுவ கட்டளை அமைப்பில் மேற்கொள்ளப்படும் மிகப்பெரிய மறுசீரமைப்பாக கருதப்படுகின்றன.

1976ஆம் ஆண்டு இராணுவம், கடற்படை மற்றும் விமானப்படைக்கு இடையிலான ஒருங்கிணைப்பை மேற்கொள்ளும் வகையில் Chairman of the Joint Chiefs of Staff Committee (CJCSC) பதவி உருவாக்கப்பட்டது.

தற்போதைய மறுசீரமைப்பில் அந்தப் பதவி முழுமையாக நீக்கப்பட்டுள்ளது. அதற்குப் பதிலாக Defence Forces Headquarters (DFHQ) என்ற புதிய தலைமையகம் உருவாக்கப்பட்டுள்ளது.

இந்த தலைமையகத்துக்கு Chief of Defence Forces (CDF) தலைமை வகிப்பார். தற்போது இந்தப் பதவியை ஃபீல்ட் மார்ஷல் அசிம் முனீர் வகிக்கிறார். அவர் பாகிஸ்தான் இராணுவத் தளபதியாகவும் தொடர்ந்து பதவி வகித்து வருகிறார்.

புதிய கட்டமைப்பில் பாகிஸ்தான் கடற்படை மற்றும் விமானப்படைக்கு எவ்வாறு பிரதிநிதித்துவம் வழங்கப்படும், இந்த மாற்றங்களுக்கான பிரதான காரணங்கள் என்ன என்பது குறித்து இராணுவத்தின் ஊடகப் பிரிவான Inter-Services Public Relations (ISPR) அமைப்பிடம் கேள்விகள் எழுப்பப்பட்டிருந்த போதிலும், அதற்கு பதில் கிடைக்கவில்லை.

இந்த புதிய சட்டங்கள் மூலம் பாகிஸ்தானின் இராணுவத் தலைமையில் அதிகாரங்கள் மேலும் ஒருங்கிணைக்கப்பட்டுள்ளதுடன், CDF பதவிக்கு முன்பிருந்ததைவிட தெளிவான சட்டரீதியான அதிகாரங்களும் வழங்கப்பட்டுள்ளன.

Â

Â

Â